Қаланың іргесіндегі Ясный елді мекенінің тұрғындары сасыған иістен зардап шегіп отыр. Тұрғындары күн санап өсіп келе жатқан ауылдың маңында құс фабрикасы бар. Ясныйлықтардың фабриканың жұмысына қарсылығы жоқ. Тек құс нәжістерін ауыл іргесіне әкеп өртемесе дейді. Ауыл маңындағы қоқысқа сағат сайын әкеліп төгілетін үйіндіден шығатын хош иіс тұрғындардың тынысын тарылтып біткен. Ясный ауылының тұрғындары саф ауаны ұмытқалы қашан. Жаз басталса мазалары қаша бастайды. Кешке қарай ауаға тарайтын жағымсыз иіс онсыз да ысыған пәтердің терезесін ашуға мүмкіндік бермейді. Иіс ауылдың іргесіндегі қоқыс полигонынан тарайды. Полигонның жанында ірі құс фабрикасы жұмыс істеп тұр. Фабрикадан сағат сайын шығатын техникалар мұнда құс нәжістерін әкеп төгеді. Тұрғындардың айтуынша, түн жарымында қоқыстарға әдейі өрт қойылады. Жағымсыз иістің жырын айтып олар барлық құзырлы мекемелерге бас сұққан. Өткен дүйсенбі күні құс фабрикасының басшысына кіре алмай кетіпті. Фабриканың күзетшісі басшылықтың жоқ екенін ескертіп кіргізбеген. Ал, облыстық экология департаменті тұрғындардың тілегімен қатар қолдары қойылған үш бет арызға жауап қатпаған. Жаз басталса жыр болатын бұл мәселе қала әкімінің есебінде де көтерілген. Шаһар басшысы Ільяс Испанов бұл өткір мәселені тез арада шешуге Алматы ауданы әкімшілігі мен облыстық экология департаментіне тапсырған болатын. Қала әкімінің есебі ақпан айында өткелі 4 айдан асса да мәселе шешілмейтін секілді. Үміттері үзілуге айналған тұрғындар бұл мәселені тағы бір рет облыс әкімінің алдына жиналып барып айтуға белдерін бекем буып отыр. Халықтың одан басқа амалдары қалмаған.