Үйіңіз жылы ма?
Ақтөбеде орталықтандырылған жылуға қосылмаған үйлер бар. Дені бау-бақша ұжымында. Бірі газ балондарын қолданса, енді бірі әлі де пеш жағады. Соңғысын көмір бағасы қинайды. Өйткені, отынның бұл түрі жылда қымбаттап жатыр, дейді. Айта кетейік, былтыр көмірдің бағасы тоннасына 22 500 теңге болса, биыл 23 500 ден саудаланып жатыр. Біздің үйді жылыту үшін 3 тоннадай көмір қажет. Егер отын сапалы болса, күзден көктемге дейін жетеді. Көмірді таңертең салсаң, кешке дейін жылуын сақтап тұрады. Түнде тоңбас үшін тағы отын саламыз. Көмірдің сапасы түрінен ақ көрініп тұрады. Көршілерімнің айтуынша, соңғы кездері сатып алған 1 тонна көмірдің жартысы тас болып шығып жатыр. Оны үйге дейін көлік жалдап, жеткізуің тағы шығын. 3 тоннасын біз бірден тиеп, алдырамыз. Себебі жүк көлігінің әрбір рейсі қып-қызыл ақша, 10-15 мың теңгеден алады. ))Синоптиктер алдағы қыс қатты болатынын айтып, дабыл қағуда. Ал коммуналдық мекемелер жылыту маусымына дайындықты биыл ерте бастады. Жаз бойы қазандықтар жөнделіп, желілер сынақтан өтті. Мұндағы мақсат тұрғындарға ыстық суды жылдың 4 мезгілінде де тұрақты беріп, жарты жыл бойы жылумен қамту. Көп қабатты үйлерде кінәрат жоқ, әйтсе де жер үйлердің тұрғындары қыстың қаһарын сезіп жатырмыз, дейді. Ресми деректерге сүйенсек, елімізде көмір өндірісі қарқынды жүруде. Сондықтан да тапшылық болмауы тиіс. Мәселен, биылғы 7 айдың өзінде бұл қарқын бәсеңдемей, 67,6 млн тонна көмір өндірілген. Осы көмірдің 16,3 млн-ы ендігісі еліміздегі Жылу-электр орталықтарына жеткізіліпті. Бұл өткен жылмен салыстырғанда 250 мың тоннаға артық. Ал қалғаны елді мекендерге, өнеркәсіп ошақтарына жеткізілуде. Ендеше, саяжай тұрғындары мен алыс шалғайдағы ағайын биылғы қыстан қысылмай шығады деген сенімдеміз.
Количество показов: 413
Дата создания: 11.12.2024 07:37:16
