Облысымызда жұмыс сапарымен жүрген ҚР Парламент мәжілісі төрағасының орынбасары Владимир Божко бүгін Қурайлы ауылына барды. Былтыр көктемгі су тасқынында бар жиған-тергенінен айрылып, бүгінде Қурайлыда жаңа қоныстарын салып жатқан тұрғындармен кездесті.
Қурайлы селолық округінде қызыл судан жапа шеккендерге 81 жер учаскесі берілген болатын. Соның 73-іне үй тұрғызылып, пайдалануға берілді. 8 учаскеде құрылыс жүріп жатыр. Үйлерге көгілдір отын, электр жарығы, ауыз су кіріп тұр. Тіпті жаңа үйлер тұрғызылған көшелер де жарықтандырылып үлгерген. Қалған іс уақыт өте тындырылады. Кезінде төтенше жағдайлар министрлігін басқарған Владимир Божко табиғи апаттан зардап шеккендердің бұлайша тез ес жиып, етек-жеңдерін түзеп жатқанына ризашылық білдірді.