Қурайлы ауылдық округіне қарасты ауылдарда жолдар жөнделеді. Ауыз су мәселесі тек Өрлеу ауылында ғана шешімін таппай отыр. Бұл туралы бүгін Қурайлы селолық округінің әкімі Мақпал Тұрмағанбетова халықпен есептік кездесуі барысында айтты. Қурайлы ауылдық округіне ауыз су толық жеткен жоқ. Өрлеу ауылының тұрғындары таңмен таласа тұрып, құдыққа жүгіреді. Ал Елек ауылының тұрғындарын қатынас мәселесі қинайды. Әкімнің есептік кездесуіне келген жұрт ауыл мен қала арасында дұрыс қатынайтын автобус сұрады. Өрлеу ауылы тұрғындарын сапалы ауыз сумен қамтамасыз ету мақсатында жерасты суларының қоры іздестірілді. Құжаттары дайын. Ауыз су мәселесі биыл шешімін табады деген үміт бар. Ауылда мектеп пен балабақша тапшылығы жоқ. Мамандар да жеткілікті. Қурайлы селолық округіне 5 елдімекен кіреді. Олар- Георгиевка, Елек, 39-бекет, Өрлеу мен Қурайлы ауылдары. Мұнда 10 мыңнан астам адам тұрып жатыр. Ауылдық округтің жалпы аумағы 45 мың гектар. Биылдан бастап селолық округ өз бюджетін өзі басқарады. Былтыр облыстық бюджеттен Қурайлы ауылдық округіне 180 млн.теңге қаржы бөлінді. Бұл қаражат толық игерілген. Санитарлық мәселелер, жаз мезгіліндегі мал күтімі, қысқы мал азығы, білім беру ұйымдарын жөндеу, әлеуметтік аз қамтылған тұрғындарға көмектесуге жұмсалған. Елек ауылында 2 балабақша салынды. Қурайлы ауылдық округінің әкімі ауыл тұрғындары алдында өткен жылы атқарылған жұмыстары мен алға қойған міндеттері туралы баяндады. Есептік кездесу барысында тұрғындардан түскен талап, тілектер тыңдалды. Дені- автокөлік жолдарын жөндеу, көшелерді жарықтандыруға қатысты.