Әуе қалашығы ауданындағы жылу тарату орталығы іске қосылды. Бірнеше жылдан бері бұзылып тұрған қазандықтар кесірінен тұрғындар қыста пәтерлерінде бүрсеңдеп отыратын. Жаңа жыл қарсаңында бұл мәселе шешілді. Қалабасы Асхат Шахаров бүгін жылу орталығында болып, жағдайдың қалыпқа келгеніне көз жеткізді. Қыс түссе өз үйлерінде тоңып отыратын Әуе қалашығы ауданының тұрғындары бүгінгі күнді ұзақ күтті. Бүгін қала басшысы осы ауданды жылумен қамтамасыз ететін орталықта болып, мұндағы жөндеу жұмыстарының толық аяқталғанына көз жеткізді. Қазір 4 бірдей жылу қазандығы толық жұмыс жасап тұр.
Естеріңізге сала кетсек, соңғы жылдары Әуе қалашығы ауданындағы көп қабатты үйлерге жылу беркелкі таратылмай, тұрғындар қиындық көрген еді. Осыдан төрт жыл бұрын Еуразиялық қайта құру , даму банкінен бөлінген ақшаға қазандықтарды жөндеуді мойнына алған мердігер компания жауапсыз болып шықты. Төрт жыл ішінде қазандықтарға қажетті қосалқы бөлшектер қымбаттап кетіп, бөлінген қаражат желге ұшқандай болды. Қала басшысы қазынадан тағы қосымша қаражат қарастырылып, мәселе шешімін тапқанын жеткізді.
1976 жылы пайдалануға берілген жылу орталығының екі қазандығы жөндеуден өткізіліп, төртінші қазандық жаңадан сатып алынған . Сондықтан, қазір жылу орталығы толықтай жұмыс істеп тұр. Қала басшысы бұл ауданда жылу мәселесі толық шешімін тапқанын жеткізді. Қазір мамандар әрбір пәтерге жылу тарататын құбырларды толық тексеруден өткізіп жатыр. Жалпы жаңартылған жылу орталығы 43 көп қабатты үй мен 7 бірдей бюджеттік мекемені жылумен қамтып отыр.