Әуеқалашығы ауданында гаражда тұрған көлік жарылып, бір адам дене күйігімен ауруханаға түсті. Оқиға бүгін таңғы жеті жарымдар шамасында болған. Куәгерлердің айтуынша, таңда гараж ішінен гүрс еткен дыбыс шығып, кейін өртенген. Қатты жарылыстан жапсарлас салынған бес гараж қираған. Екеуі қатты бүлінген. Жалынды ауыздықтауға 21 өрт сөндіруші мен 5 техника жұмылдырылды. Әуеқалашығы ауданы тұрғындарының ұйқысын қашырған оқиға бүгін таңда болған. Жарылыстың қатты болғаны соншалық екі гараж қирап, тағы үшеуі бүлінген. Жарылыстың салдары анықталу үстінде. Әзірге болжам бойынша, зардап шеккен 50 жастағы жүргізуші гараж ішінде тұрған темір тұлпарын оталдырып, өзі сыртқа шығып кеткен болуы мүмкін. Денесін 35 % күйік шалған азамат облыстық жедел жәрдем ауруханасына жеткізілген. Әуеқалашығы ауданында сонау 1989 жылдары тұрғызылған жертөле іспеттес гараждар әлі күнге сақталған. Ауданның байырғы тұрғындары гараждарын жақсы күйде сақтаған. Тұрмысқа қажетті барлық бұйымдарын осында жинайды. Көпшілігі көліктерін кіргізіп қояды.