Ақтөбедегі кәсіпорындардың бірінде мазут құйылған цистерна жарылып, бір адам қаза тапты. Қайғылы оқиға жаңа жылдың алғашқы күні, түскі уақытта болған. Марқұмның аты -Жанат екені белгілі. Қазір оның қайда және кім болып жұмыс істегені, төтенше жағдайдың қалай болғаны анықталып жатыр. Кеше Ақтөбеде екі адамды пойыз қағып кетті. Олар авто вокзал маңындағы темір жол өткелін кесіп өтпек болған. Ер адам оқиға орнында мерт болды. Ал 65 жастағы әйел қазір облыстық ауруханада жатыр. Қайғылы жағдай 2-қаңтар күні түскі сағат 12-лер шамасында болған. 30-желтоқсан мен 2-қаңтар аралығында қалалық жедел жәрдем бекетіне 2693 шақырту түскен. Алғашқы көмекке жүгінгендердің 900-ден астамы бала. Олар-жұқпалы вирусты инфекцияға шалдыққан. Дене қызуы көтеріліп, жөтеліп шыққан нәрестелер де бар. Дәрігерлер мұны ауа райының күрт жылынуымен байланыстырып отыр. Ал ересектердің қан қысымы жоғарылап, жүрегі сыр берген. Мейрам күндері 15 жол көлік апаты тіркелді.