Өткен сенбіде футболдан Қазақстан Премьер-лигасының 23-і туры аясында "Тобыл" мен "Ақтөбе" кездесуінен кейін жанкүйерлер жаппай төбелескен. Тіпті олар бір-біріне қарсы түтін шашкаларын да қолданған. Бұл ойында қостанайлық команда 1:0 есебімен жеңіске жетті. Алайда, ойын нәтижесіне наразы ақтөбеліктер төреші әділетсіз болды, дейді. Осы ойыннан кейін фавориттер "Ақтөбе" мен "Астана" командаларының арасын 1 ғана ұпай ажыратып тұр. Елордалықтар "Қайратты" 4:0 есебімен жеңіп, 4 ұпайлық алшақтықты қысқарта алды.Футболдан Қазақстан чемпионатының 23-туры аясында "Тобыл" мен "Ақтөбе" арасындағы кездесу даумен аяқталды. Ойын нәтижесіне наразы ақтөбеліктер төреші әділетсіз болды, дейді. Тіпті жанкүйерлер арасында челлендж басталған. Төреші Сәкен Бәйімбеттің телефон номерін жариялап, оның мобильді банкіне 100 теңгеден ақша жіберген. Әр жіберілген ақшамен "Садақа", "Сайқымазақ" деген сияқты хабарлама қоса жіберіліп жатыр. Ойын алаңында жанкүйерлер жаппай төбелес кезінде бір-біріне қарсы түтін шашкаларын қолданған. Төбелесте ешкім де әкімшілік жауапкершілікке тартылмаған. Тек ұсталған 2 жерлесімізге тәртіп сақшылары түсіндірме жұмысын жүргізген. Қостанайлық жанкүйерлердің әлеуметтік желіде жазбасына сенсек, ақтөбеліктер өздерін дөрекі ұстаған, кейін жанжал туған. Ал, жерлестеріміз бізді жаман қырымыздан көрсетеді, дейді. Айта кету керек, бүгінде "Ақтөбе" футбол клубы Қазақстан футбол федерациясына шағым жіберген. Бұл ойында шешуші гол ойынның 87-ші минутында пенальтиден соғылды. Оның авторы Серікжан Мұжықов. Алғашқы соққыны Стас Покатилов қайтарған еді. Алайда төреші VAR-дың көмегіне жүгініп, қайта пенальти тағайындады. Онымен қоймай, жанкүйерлердің пікірінше "Тобыл" ойыншысы өз айып алаңында қолымен ойнаған. Төреші бұған да назар аудармаған. Айта кету керек, 24-қазан "Ақтөбе" футбол командасы түркістандық "Тұран" футбол клубымен кездеседі. 29-қазан "Ордабасыға" қарсы ойнаса, 6-қарашада "Қайрат" футбол клубымен матч өткізеді. Бұған дейін оқ бойы озық келе жатқан біздің құрама ел чемпионатының 23-і туры нәтижесінде "Астана" командасынан тек 1 ұпайға ғана алда. Қазақстан премьер-лига ойындары басталған 1992-ші жылдан бері 5 мәрте футболдан ел чемпионы атанған "Ақтөбе" биыл 8 жылдық сәтсіздікті үзе алар ма екен? Соңғы рет Қазақстан чемпионатын "Ақтөбе" құрамасы 2013-ші жылы ұтқан.