Өткен демалыс күндері қаланың өзен-көлдерінде үш адам суға батып кетті. Оның екеуі кәмелет жасқа толмаған бір үйдің қыздары. Олар суға түсуге тиым салынған жерде шомылған. Ал 30 шілде күні түс ауа Заречный-1 ауданы маңындағы "Оңтүстік айналма көпір" астындағы судан 18 жастағы жігіттің мүрдесі шығарылған. Сүңгуірлер оның денесін жағадан 10 метр қашықта, 3 метр тереңдіктен тапты. Өңірде суға түсу маусымы басталғалы 19 ақтөбелік бақилық болған. Оның сегізі балалар. Көп жағдайда суға түсушілер рұқсат етілмеген жерлерде шомылған. Өткен сенбі күні бір үйдің қос қызы кешкілік Заречный-1 ауданы маңындағы "Оңтүстік айналма көпір" астындағы суға шомылған. 9 және 11 жастағы қыз балалар ата-анасымен бірге демалуға барған. Сүңгуірлер олардың денесін жағадан 15 метр қашықта, 3 метр тереңдіктен алып шыққан. Балаларымен бірге суға шомылған анасы оларды құтқармақ болған. Тұңғиыққа бірге батып кете жаздаған оны жолдасы құтқарып қалған. Сондай-ақ, кеше 12-ші шағын аудандағы №20 үйдегі пәтерлердің бірінде өрт шықты. Алдын ала таратылған мәлімет бойынша, пәтердегі газ плитасы өртеніп кеткен. Абырой болғанда қызыл жалыннан тұрғындар зардап шекпеді. Көпқабатты үйдің 16 тұрғыны дереу сыртқа шығарылған. Оның 4-уі бала. Қою түтінді ауыздықтауға алты бірлік техника мен 25 құтқарушы жұмылдырылған. Жалын 40 шаршы метрге жайылған. Өрттің шығу себебі мен келтірілген материалдық шығыны анықталуда.