Кешеден бері толассыз жауған жауын Сәңкібай батыр даңғылындағы № 159 үйдің тұрғындарын әуреге салды. Көп қатарлы үйдің әбден тозығы жетіп, табиғаттың тосын мінезіне төтеп бере алмай тұр. Үй терможаңғырту бағдарламасы бойынша күрделі жөнделуі қажет. Оған тұрғындар келісімін беріп, ол құжат жүзінде бекітілген. Алайда, бір жыл болды, еш әрекет байқалмайды. Бір жылдан бері мына бес қабатты үйдің тұрғындары терможаңғырту бағдарламасы бойынша жөндеуді күтіп жүр. Жауын жауса шатырдан су сорғалап, бірінші қабаттан бір-ақ шығады. Оған қоса үйдің жылу желілері толығымен тозығы жетіп тұр. Тұрғындар осы жағдайларды ескеріп, мемлекеттің терможаңғырту бағдарламасына қатысу үшін әкімдікке арыз жазған. Тиісті құжаттар жиналып, оңтайлы жауап та алынған. Алайда, әлі жөндеу жұмыстары басталмаған, үй сол күйі тұр. Бақытжан Аманжоловтың айтқанын қалалық тұрғын үй қатынастары бөлімінің мамандары да растады. Бұл үй күрделі жөнделу үшін кезекте тұр. Алайда облыста терможаңғырту бағдарламасын жүзеге асыру үшін үкіметтен тиісті қаржы бөлінбей отыр. Ақнұр Қазбаеваның айтуынша, ағымдағы жылы осындай 45 көп қабатты үй терможаңғырту бағдарламасы бойынша күрделі жөндеуден өтуі керек еді. Жобалық-сметалық құжаттар дайын. Алайда, қаржының бөлінбеуі жұмыстың басталуына қол байлау болып отыр. Егер жыл соңына дейін қаражат бөлінбесе, жөндеу жұмыстары келер жылдың жазғы маусымына қалдырылады.