2020 жылы Қазақстанда кепілді тегін медициналық көмектің жаңа пакетін және міндетті әлеуметтік медициналық сақтандыруды енгізу нәтижесінде медициналық қызметтердің тарифін 15 пайызға өсіру жоспарланып отыр. Бұл туралы бүгін үкімет отырысында денсаулық сақтау министрі Елжан Біртанов мәлімдеді. Көрсетілетін медициналық қызметтердің бағасы 15 пайызға өссе, медициналық қызметкерлердің жалақысы 30 пайызға көтеріледі. Ал келесі жылы бір адамға көрсетілетін медициналық көмектің шығыны биылғы көрсеткіштен 76 пайызға ұлғайып, 92 мың теңгеге жетеді. Қазір емханаларда қызметтер бұған дейін бекітілген көлемде көрсетіліп жатыр. Сақтандыру енгізілгенде қымбат диагностикалық қызметтерді қаржыландыру үш есеге, стоматологиялық қызметтер үшін бөлінетін қаржы 2,3 есеге өседі. Міндетті әлеуметтік медициналық сақтандырудың арқасында халықтың қалтасынан шығатын шығын азаяды деді денсаулық сақтау министрі Елжан Біртанов. Ал қазір құны жоғары түрлі тексерулерден тек жекелеген топтағы азаматтар ғана өте алады. Өзгелер үшін бәрі ақылы. Жаңашылдық енгізілген кезде тұрғындардың барлық шығынын міндетті әлеуметтік медициналық сақтандыру қоры өтейді. Бүгін үкімет отырысында мәлімет берген денсаулық сақтау министрі қазір жаңа жүйеге қызу дайындық жүріп жатқанын айтты. Жаңа пакеттер биыл күзде еліміздегі аймақтардың бірінде сынақ ретінде іске қосылмақ. Ал жаңа жүйе 2020 жылдан бастап Қазақстанның барлық аймақтарында іске қосылады. Сақтандыруға қосылған азаматтар үшін медициналық қызметті алу жеңілдейді. Кеңес беру, диагностикалық көмектерді қаржыландыру үш есеге артады. Елжан Біртанов тек қазір тегін көмектің мәнін түсінбей жатқандар бар. Сол себепті денсаулық сақтау министрлігі мен әкімдіктер бірігіп жергілікті жерлердегі халыққа бұл жүйенің мақсаты мен міндеттерін, артықшылықтары мен ерекшеліктерін түсіндіру үшін ақпараттық-түсіндіру жұмыстарын қолға алмақ. Қазір медициналық сақтандыру қорына Қазақстан бойынша 176,7 млрд теңге көлемінде жарна аударылған. Жиналған қаржы Ұлттық банкте сақталады және 2020 жылдан бастап міндетті әлеуметтік медициналық сақтандыру шеңберінде көрсетілген қызметтер ақысын төлеуге жұмсалады.