Шаһарда "Таза бейсенбі" екі айлық акциясы бастауын алды. Акция аясында апта сайын қаладағы барлық нысандар өз аумақтарында санитарлық талаптарды сақтай отыра сенбілік өткізуі шарт. Бүгін Сәңкібай батыр даңғылы мен 101 атқыштар дивизиясы көшесінде бірнеше нысан жұмысшылары сенбілікке шықты. Сыпырғыш, тырмамен қаруланған жандар тал-теректің түбін қоқыстан тазартты. Шашылған бөтелке мен қағаздарды жинады. Екі ай бойы сенбіліктер қала аумағындағы 200-дей көшеде өтеді. Қала маңындағы ауылдарда да мұндай тазалық жұмыстары жалғасын табады. Биылғы "Таза бейсенбі" акциясы аясында әрбір мемлекеттік мекемелердің бөлімдеріне үш көшеден берілген. Яғни 60 күнде қала айнадай жарқырап тұруы тиіс. Тазалыққа атсалыспаған нысандардың иелеріне алғашында ескерту беріліп, құлақ аспаса ірі көлемде айыппұл салынады. Бүгінгі сенбілік барысында 101- атқыштар дивизиясы, Марат Оспанов көшесі мен Сәңкібай батыр даңғылы бойы әбден ластанғаны белгілі болды. Шаһардың орталығы тазалықты қажет етіп тұр. Иманов көшесінде орналасқан №33- орта мектеп маңы да шашылып жатыр. Сондықтан қалалық ішкі саясат бөлімінің мамандары мектеп басшылығына тез арада сенбілік ұйымдастыруы қажеттігі турасында хат жолдамақ. Екі ай бойы жаппай сенбіліктер өтуіне байланысты қаланың барлық қоқыс қабылдау полигондары ашық болады. Аула, үй маңдарына тазалық жүргізген жер үйлердің тұрғындарына үлкен көліктерді жалдап, өз күштерімен жеткізуге де рұқсат берілген. Жаппай сенбіліктерді ұйымдастыру барысында ара қашықтық сақтап, бетперде кию аса маңызды.