Облыстық көліктік бақылау инспекциясы қызметкерлері жол-патрульдік полициясымен бірге өңірде "Автобус" жедел алдын алу шарасын жүргізіп жатыр. Бүгін олар қаладан Хромтауға шығатын жолда рейд өткізді. Жолаушы тасымалымен айналысатын көліктерді бақылау Ырғызда болған оқиғадан соң күшейтілді. Жылжымалы көліктік бақылау бекеті облыстық көліктік бақылау инспекциясына тиесілі. Біздің елде соңғы 5 жылдан бері инспекция көліктерді тексермейді. Бұл құзірет олардан алынып, жол-патрульдік полициясына берілген. Алайда "Автобус" жедел алдын алу шарасын өткізу осы екі ведомствоға тапсырылған. Талап бойынша жолаушы тасымалымен айналысатын автобустар міндетті техникалық тексеруден өткізіліп тұруы қажет. Сондай-ақ, жолға шығарда, сапардан оралғанда техникалық жағдайы тексеріледі. Жүргізушілер медициналық тексеруден өтеді. Борттық журналдың бар-жоғы міндетті түрде тексеріледі. Борттық журналда жолаушылардың тізімі, аты-жөндері жазылуы керек.