Жуырда Әбілқайыр хан даңғылы бойындағы талдар да оталуы мүмкін. Орнына отбасылық дәмхана салынады. Екі үйдің ортасынан жер бөлініп, кәсіпкерге жалға берілген. Әбілқайыр хан мен Абай даңғылдарының тұрғындары бүгін редакциямызға шағымданды. Абай және Әбілқайыр хан даңғылдарының бұрышындағы №2А, 37 үйлер тұрғындарының наразылығы былтыр басталған. Белгісіз біреулер келіп екі үйдің арасындағы жер учаскесіне отбасылық дәмхана салынатынын айтқан. Тіпті, құрылыс жүргізу үшін талдар да кесіледі. Ал, жазда сая болатын ағаштарды он жыл бұрын тұрғындар өздері отырғызған. Көктем шығысымен айналаны тазартатын да өздері. Жанұялық кафенің салынғанына баспана тұрғындары түбегейлі қарсы. Айналаны мүңкіген иіс жайлап, үйлерді жазда тышқандар жаулайды деп қорқады. Бұл үйлердің ауласы бар деген аты ғана. Ашық жер жоқ. Айнала қойылған көліктерден аяқ алып жүру мүмкін емес. Ауланы адамдар әрлі-берлі өтетін жол қылған. Ал, бас даңғылдағы субұрқақ маусымы ашылса, жағдай мүлдем қиын. Айнала айқай-шу, аулалар қоқысқа толады. Отбасылық дәмхананың құрылысына қалалық сәулет және қала құрылысы бөлімі рұқсат берген. "Ақтөбе" әлеуметтік кәсіпкерлік корпорациясына жалға берілген. Яғни тұрғындардың шағымы негізсіз дейді қаланың бас сәулетшісі. Себебі, жер учаскесі қалалық әкімдікке тиесілі. Әбіқайыр хан даңғылы №37, Абай даңғылы №2А үйдің ортасына дәмхана салу туралы рұқсат кәсіпкерге былтыр сәуірде берілген. 2023 жылға дейін жарамды. Жер учаскесіне биіктікі 4,5 метр болатын 1 қабатты ғимарат тұрғызылады. Жер көлемі 400 шаршы метрге жуық. Қаланың бас сәулетшісі Таңат Шегебаевтың сөзінше, ғимарат жобада көрсетілген талаптарға сай салынады.