Жасыл желектен адамның жаны қымбат. Өзен жағасындағы талдардың аяусыз қырқылып, ылғалдың азайып жатқанын көрген ақтөбеліктер алаңдаулы. Осыған орай бүгін қалалық әкімдікте жиын өтті. Қалада жол картасына сай 8 өзеннің арналарын кеңейту, табанын тереңдету, тазарту және жағаларын бекіту жұмыстары жүргізіліп жатқаны белгілі. Оған 7 миллиард теңгеге жуық қаржы жұмсау көзделген. Қала ішінде Бұтақ, Қарғалы, Елек өзендерінде осындай жұмыстар жүріп жатыр. Өткен жылдың соңында басталған құрылыс биыл желтоқсанда аяқталуы тиіс. Су ішіндегі, одан қалды жиегіндегі талдар түгел оталған. Жоба аясында 35 мың түп тал шабылып, 1 300 гектар жердегі көшеттер қырқылуы керек, деген еді облыстық экология департаментінің басшысы Жақсығали Иманқұлов журналистерге берген сұхбатында. Бұл ескірген ақпарат, дейді жобаның бас инженері Еркін Тәжғалиев. Өзен арналарын кеңейту жұмыстарына 4 мердігер мекеме тартылған. Негізгі мақсат, 2017-ші жылғы су тасқынының қайталануына жол бермеу. Ал өзен арналарының кеңейтіліп, табандарының тереңдетілуінен су деңгейі мүлдем түсіп кетті. Енді саяжай иелері биыл жазда бақшаны суаратын ылғал таппай қалмаймыз ба деп алаңдаулы. Арналарды аршу жобасына су жинау құрылыстарын салу енбейді. Бақшаларды суаратын ылғал жинау біздің міндетімізге кірмейді, деді Еркін Тәжғалиев. Жоба шеңберінде су жолымен кезінде қалай болса солай өткізілген инженерлік желілер толықтай қайта тартылатын болады.