Қаладағы жұмыссыз азаматтар есебінде тұрғандар еңбек етуге аса ынталы емес. Бос жұмыс орындары жәрмеңкесінде ұсынылған қызметтер саны көп. Қатысқан 40 шақты мекеме 385 бос жұмыс орнының тізімін жариялап қойған. Ер азаматтарға аула сыпырушы, дәнекерлеуші, электрик мамандықтары бар. Ал әйелдерге аспаз, есепші, кеңсе қызметкері жұмыстары ұсынылған. Жалақы 40-60 мың теңге аралығында. Екі қолына күрек таппай жүргендер қатарында Қуанышбек Аймағанбетов те бар. 8 жылдан бері тұрақты жұмысы жоқ. Жанұясын жеке көлігімен қала ішінде такси болып қатынап асырап отыр. Былтыр қалалық жұмыспен қамту орталығына тіркеліп, электрик мамандығына 6 айлық курста оқыған. Енді сол қағазы бойынша кәсіпорындарға жұмысқа тұруға ниетті.
Орталықтағылар жұмыссыз азаматтар есебінде тұрғандар еңбек етуге аса ынталы емес дегенді алға тартады. Бос жүрген азаматтар жалақы көлеміне қанағаттанбайды. Жылына 8-9 мәрте өткізілетін бос жұмыс орындары жәрмеңкесінде екі қолына бір күрек таппай жүргендерге ұсынылатын қызметтер саны көп. Мекемелер мамандық игермеген азаматтарды кәсіби оқытып алуға да қарсы емес.
Жәрмеңкеде бұрын сотталған азаматтарға да мамандықтар ұсынылды. Бұрын істі болып, түрмеден жазасын өтеп шыққан 5 адам өндіріс орындарына жұмысқа тұрды. Бұған дейін өткізілген екі мамандандырылған бос жұмыс орындары жәрмеңкесінде 18 сотталған азамат мекемелерге тұрақты жұмысқа орналасқан болатын.