Төтеншеліктер жылыту маусымына дайындық жұмыстарын пысықтады
Облысымызда жылыту маусымына дайындық жұмыстары басталды. Құтқарушылар тұрғын үйлерді аралап, пеш, түтін мұржасы мен электр желілерінің қауіпсіздігін тексеруде. Биыл өңірде өрт саны азайғанымен, тілсіз жаудан қаза тапқандар көбейген. Сондықтан мамандар тұрғындарды жылыту маусымына алдын ала дайындалуға шақырады. Қалада жылыту маусымына дайындық аясында тұрғын үйлердегі өрттің алдын алуға бағытталған профилактикалық жұмыстар басталды. Осыған байланысты құтқарушылар полиция, жергілікті атқарушы органдар, газ және энергетика қызметтерінің өкілдерімен бірлесіп, аулаларды аралап, тұрғындарға қауіпсіздік талаптарын түсіндіруде. Мамандар пештер мен түтін мұржаларын, электр сымдары мен жылыту құрылғыларының жарамдылығын тексеріп жатыр. Мамандардың айтуынша профилактикалық жұмыстар ең алдымен әлеуметтік осал топтардың үйлерінде жүргізілуде. Жыл басынан бері өңірде 316 өрт тіркелген. Бұл өткен жылдың сәйкес кезеңімен салыстырғанда 27 жағдайға аз. Алайда өрт салдарынан қаза болғандар саны артқан. Биыл 8 адам көз жұмса, өткен жылы бұл көрсеткіш 5 адам болған. Мамандар тұрғындарды суық түскенге дейін жылыту жүйелерін тексеріп, пеш пен түтін мұржаларын тазалауға және электр желілерінің қауіпсіздігіне мән беруге шақырады. Сондай-ақ иіс газымен уланудың алдын алу талаптарын сақтаудың маңызы ескертілді.Количество показов: 10
Дата создания: 15.08.2026 02:20:56
