Төтенше жағдай кезінде бір қаладан екінші қалаға жеткісі келетіндер заң бұза бастады. Кеше Қобда бағытындағы блокпостта осындай бір дерек тіркелді. Оралдан Ақтөбеге жасырып, жолаушы жеткізбек болған жүргізушінің ісін сот қарайды. Ақтөбе мен Орал қаласы арасына жасырын адам тасып жүрген жүргізуші Қобда бағытындағы №1 блокпостта тоқтатылды. «Хонда-Элюзион» көлігінде жүргізушіден бөлек тағы төрт жолаушы болған. Тексеру барысында автокөлік жүргізушісі фармацевтика компаниясының өкілімен Ақтөбеден Орал қаласына дәрілік заттарды тасымалдағаны анықталды. Сондай-ақ, заңсыз пайда таппақ ниетпен «Индрайвер» қосымшасының көмегімен жүргізуші және фармацевтика компаниясының өкілі Ақтөбеге жолаушы жинап, тасымалдаған. Полиция қызметкерлері еріктілермен бірге көше тәртібін бақылап жүр. Бірақ, қала ішінде төтенше жағдай режимі жиі бұзылады. Мәселен, кеше полиция қызметкерлері түнгі он жарымдар шамасында Ақжар-2 ауданында ішімдік ішіп, көшеде жүрген бір ер адамды ұстады. 36 жастағы ер адам Құрмыш ауданының тұрғыны болып шықты. Оған 27.780 теңге айыппұл салынған. ПД баспасөз қызметінің жетекшісі Ерболат Сарқұловтың айтуынша, төтенше жағдай режимін бұзушылар күн сайын артып келеді. Қалада бақылау күшейтілген. Өңірдегі қатаң тәртіп бәріне ортақ. Дегенмен, ақтөбеліктер заңды бұзуға тым әуес. Бірақ заңға бағынбағандар ескерту алып, оны ескермегендер айыппұл, одан қалды темір торға тоғытылатыны қаперіңізде жүрсін.