Ақтөбелік полицейлер бұрынғы әйелін өлтірмек болған қала тұрғынына оқ атты. Кеше, кешкі сағат 7-лер шамасында 23 жастағы күдікті қолына пышақ ұстап, Батыс-2 ауданындағы тіс емханасына барған. Ол емхана қызметкерін кепілге алып, "Әйелімді шақырмасаң өлтіремін",- деп қорқытқан. Бұл - кеше қылмыс болған тіс емханасы. Бүгін медициналық мекеменің есігі жабық. Куәгерлердің айтуынша, емхана қызметкерін кепілге алған сәтте мұнда екі адам тісін емдетіп жатқан. Полицияның мәліметі бойынша, күдікті әйелімен 7-наурызда ажырасып кеткен. Әйтсе де, үнемі қорқытып тыным бермепті. Оны өлтіруді көздеген. Әйеліне ашынған ер адам, кеше түстен кейін қайын енесінің үйіне барып, оны пышақтаған. Кейін әйелі жұмыс істейтін тіс емханасына бет алып, әкімші қызды кепілге алады. Оны пышақпен қорқытып, әйелін тауып беруді талап етеді. Арнайы операция кезінде құқық қорғаушылар бірнеше сағат бойы келіссөз жүргізген. Нәтижесінде ештеңеге көнбеген жігітті атып түсірді. Бұл оқиғаға қатысты адам денсаулығына қасақана орташа ауырлықтағы зиян келтіру және қару қолдану арқылы кепілге алу баптарымен қылмыстық іс қозғалды. Өз әрекетінің құрбаны болған жігіт - 23 жастағы Абылай Тілеуов. Жұмыссыз. Бұған дейін сотталған. Тірі болғанда ертең 24 жасқа толар еді. Пышағы бар жігіттің қолында бірнеше сағат бойы кепілде болған азаматша жарақат алмаған. Алайда, ол күйзеліске түскен. Қазір дәрігерлердің бақылауында.