2017 жылы арнасынан асып кеткен Електің суы өзен жағасындағы үйлер мен саяжай тұрғындарын әбігерге салған болатын. Үйлері суға толып, тірнектеп жиғандары сумен қоса ағып кетті. Арада төрт жыл өткеннен кейін тұрғындардың жағдайы қалай? Билік қандай көмек көрсетті? Кірпіштінің "Эко-1" деп аталатын бөлігіндегі шеткі үйде Кенжегүл Абдығалиева сегіз баласымен тұрады. Қара шаңыраққа айналған бұл үй суға толғаннан кейін тұруға жарамсыз болып қалған. Қабырға мен жерде сыз ізі көрініп тұр. Балаларының денсаулығы үшін алаңдайды. Әкімшілік көмек көрсетеміз деп уәде берген. Бірақ, құрғақ уәдемен тойдырып келе жатқанына төрт жыл болды дейді.Мұндағы тұрғындардың көпшілігі Қурайлы ауылына көшірілген. Осында қалған отбасыларға әкімдік 200 мың теңге көлемінде қаражат бөліпті. Ол жарамсыз болып қалған есіктер мен терезе тесіктерін бітеуге ғана жеткен. Қала әкімінің экс орынбасары Ұшқын Мыңбаев бұл үйдің жерін жекешелендіріп беріп, жаңа үйдің үлгісін сызуға көмектесіпті. Енді оны салуға Кенжегүлдің қаражаты жетпейді. Әкімдік материалдық көмек көрсетсе дейді. Естеріңізге сала кетейік 2017 жылы Елек және Қарғалы сияқты өзендерде су деңгейі көтеріліп, қала іргесіндегі бірнеше ауданды су басқан болатын. Жауапты органдардың мәлімдеуінше биыл Ақтөбеде суға кету қаупі жоқ. Су қоймалары да толмаған.