25 жылдың ішінде Ақтөбе полициясы тоғыз қызметкерінен айырылған. Қызмет бабында қаза болған старшина, майор, капитандарды бүгін әріптестері еске алды. Аға лейтенант Айса Қартов, лейтенант Амангелді Құсжанов, майор Абат Нұрымжанов, майор Қымбатқазы Оразалин, сержант Нұрлан Алпысбаев, аға сержант Айдос Боранбаев, капитан Рүстем Кенжалин, аға лейтенант Руслан Жолдыбаев және старшина Темірбек Жақсылықбаев. Бұлар қызметтік міндетін орындау кезінде қаза болған полиция қызметкерлері. Ішкі істер департаменті ұжымы марқұмдарды "Қазақстан полициясына - 25 жыл" төсбелгісімен марапаттау туралы шешім қабылдаған. Бүгін Қазақстан полициясы құрылған күніне орай өткен салтанатты жиында департамент басшысы Махамбет Абисатов мерекелік медальды олардың жесірлеріне, балалары мен бауырларына табыс етті. Руслан Жолдыбаевтың кеуде белгісі атасы, Ұлы Отан соғысының ардагері, полиция ардагері Айтқали Жолдыбаевқа берілді. Әйгерім Сартай 2011-жылы Шұбаршидегі лаңкестермен қақтығыс кезінде қайтыс болған аға сержант Айдос Боранбаевтың қызы. Қайғылы оқиғадан кейін бес жыл өтсе де, әкесі туралы көзіне жас алмай айта алмайды. Әйгерім әкесінің жолын қуған жоқ. Биыл мектеп бітірген қыз өзге мамандықты таңдаған. Ал, сержант Нұрлан Алпысбайдың қызы Шахназ әкем сияқты тәртіп сақшысы боламын дейді. Қызмет бабында қаза болған әріптестерін еске алған соң, мереке иелерін облыс әкімінің орынбасары Асқар Биахметов құттықтады. Бүгін ішкі істер департаментінде еңбек ететін полиция қызметкерлері грамотамен марапатталды. Ішкі істер саласының ардагерлері, қала әкімі, прокурор, мәслихат хатшысы мерекелік медальдарға ие болды.