Ақтөбедегі атышулы қылмыстық іске нүкте қойылды. Бүгін облыстық қылмыстық істер жөніндегі мамандандырылған ауданаралық сотында 26 адамға үкім оқылды. «Төрт ағайынды» ұйымдасқан қылмыстық тобының серкесі Еркін Ізбасар 12 жылға сотталды. Оның қылмыстық жолмен тапқан бар мүлкі тәркіленеді. Мемлекеттік айыптаушы бұған дейін Еркін Ізбасарды 15 жылға соттауды сұраған болатын. Сотталушы ҚР Қылмыстық кодексінің 13 бабы бойынша айыпталған еді. Судьяның оқыған үкімімен қылмыстық топтың жетекшісі келіспеді. Сот залында айқай шығарды. Судья үкім оқу кезінде тәртіпсіздікке жол берген Еркін Ізбасарды сот залынан шығаруды бұйырғанымен, ол орнында қалды. Бүгін 26 адамға сот үкімі оқылды. Алды 2 жылдан 11 жылға дейін жазаларын өтейді. Кейбіреулері бұрын сотталған. Рақымшылыққа іліккендері де бар. Бір сотталушы 2 жылға бас бостандығынан айырылып, рақымшылыққа іліккендіктен, сот залынан босап шықты. Қолхатпен сотқа қатынап жүрген 5 адам сот залында қамауға алынды. Қылмыстық топтың мұнай ұрлығымен кедергісіз айналысуына жағдай жасаған, топпен бірге әрекет еткен облыстық ІІД бастығының орынбасары Рахат Аханов 5 жыл 3 айға сотталды. Барлық мүлкі тәркіленіп, өмір бойына мемлекеттік органдарда лауазымды қызмет атқару құқығынан және полиция полковнигі атағынан айырылды. Ал Еркін Ізбасардың оң қолы болған Ауқат Қалиев 11 жылын қатаң тәртіптегі колонияда өтейді. Оның да бар мүлкі тәркіленеді. Сотталуышлардың туыстары мен қорғаушылары сот үкімімен келіспейтіндерін мәлімдеді. Әділдік жоқ деп айқайлаған олар Жоғарғы сотқа шағымданбақ.