Бүгін - бүкіләлемдік донор күні. Жылдағыдай ақтөбелік донорлар таңертең облыстық қан орталығындағы мерекеге жиналды. Орталықтың бас дәрігері тұрақты, ерікті донорларға ризашылығын білдіріп, 28 адамға алғыс хат табыс етті. Ал, Абат Мұхамбетқалиевтың кеудесіне "Денсаулық сақтау ісіне қосқан үлесі үшін" төсбелгісін тақты. Абат Мұхамбетқалиевтің қаны төртінші оң резусты. Мұндай қан тобы сирек кездесетіндіктен, донор тіркеуге алынған. 23 жылдың ішінде ол 76 рет қан тапсырған. Бұрын тұрақты қан тапсырушыларға "Құрметті донор" атағы берілетін. Жеті жылдан бері бұл марапат жойылып, "Денсаулық сақтау ісіне қосқан үлесі үшін" төсбелгісі берілетін болды. "Құрметті донор" атағы Ақтөбеде Мәншүк Каманова есімді тұрғында ғана бар. Жалпы, облыста 7 мыңдай адам донор ретінде тіркелген, олардың 300-і тұрақты қан тапсырады. Қазір орталықта 86 мыңнан астам литр қан қоры сақтаулы тұр. Тапшылық жоқ. Донорлардың сараптама үшін екінші қайтара қан тапсыруға асықпайтыны дәрігерлерді алаңдатып отыр. Жасы 18-ге толған, салмағы кемінде 55 келі, дені сау кез келген азамат донор бола алады. Қан тапсырмастан бұрын донор тегін медициналық тексеруден өтеді. Ақтөбеде 100 мың адамға шаққанда ниет білдірген жандардың 13 пайызы донорлыққа жарамай қалады.