Күндіз күлкіден, түнде ұйқыдан қалдық. Әбілқайыр хан даңғылындағы №58-үйдің тұрғындары төменгі қабаттағы дәмхананың жұмысына наразы.10 қабатты бұл үйде 246 отбасы тұрады. Терможаңғыртумен әспеттелген үй қаланың келбетіне көрік беріп тұрғаны рас. Тұрғындар ауланың кеңдігіне де риза. Үй иелерін тек екі жыл бұрын киім дүкенінің дәмханаға ауысып кеткені қынжылтады. 2017 жылы тұрғындардың қарсы болғанына қарамастан түрік дәмханасы ашылған. Содан бері бұл үйдің тұрғындары күндіз күлкіден, түнде ұйқыдан айрылыпты. №111 пәтер иесі Мәриям Көшкінбаеваның айтуынша, жаз мезгілінде қуырылған майдың иісі бүкіл қабатты алып кетеді. Терезе ашу мүмкін емес. Түнгі мезгілдегі музыканың қатты дыбысынан шаршадық. "102"-ні шақырта беруге өзіміз ұялатын болдық,- дейді тұрғын. Мәриям Көшкінбаеваның айтуынша, дәмхананың иіс сорып шығаратын құбырының ашылмай қалуынан 2017 жылы тұрғындар зардап шеккен. Қою түтін таңертең бүкіл қабатты жайлап кеткен. Улы иісті сезген үй иелері сыртқа шығып өрт сөндіру қызметін шақырады. Тұрғындардың уәжі бойынша дәмханаға бас сұққанымызда, нысанның басшысы орнында жоқ болып шықты. Әкімшісі дәмхананың заң бойынша барлық талаптарды сақтап отырғанын жеткізді. Айтуынша, сорғы құбыры әлдеқашан жөнделген. Әкімшінің сөзіне қанағаттанбаған тұрғындар енді бұл мәселелерін қала және облыс әкімшілігіне жолдауға бел буып отыр. Тұрғындардың тыныш ұйықтағылары келеді. Дәмхана не көшірілсін, не болмаса түнгі 11-ден кейін тәртіпті сақтасын деген талаптарын құзырлы орындарға тағы бір рет айтып көрмек.