Тұрғындар дүкенмен көрші болғысы келмейді. Әбілқайыр хан даңғылындағы №89- үйдің тұрғындары үйлерінің алдындағы шағын дүкенді алып тастауды талап етіп отыр. Айтуларынша, бұл жерде балалар ойын алаңы болуы тиіс. Соттың шешімі де бар. Әйтсе де, дүкен иесі көшуге асығар емес. Дау тудырған ұлтарақтай жер осы. Бұл жер телімі 2002 жылы сатылып кеткен. 17 жылдан бері бұл жерде дүңгіршекке ұқсас азық-түлік дүкені тұр. Аула болса тар. 3 подъезді тұрғын үйде 162 пәтер бар. 100- ден астам бүлдіршінге ойнайтын жер жоқ. Тұрғындар жергілікті әкімшіліктен балалар алаңын орнатуды сұраған. Айтуларынша, заңсыз тұрған дүкен кедергі келтіріп тұр. Азаматтық іс 2020- жылы сотта қаралған. 17-қарашада шыққан соттың шешімі де бар. Кәсіпкерді бұл жерді заңсыз пайдалануда деп танып, орынды босатуға үкім шығарған. Дүкен иесі болса, соттың шешімімен келіспей, ҚР- ның жоғарғы сотына апелляциялық шағым түсірген. Оңайлықпен дүкенді жаппаймыз деп отыр. Дүкен иесінің айтуынша, 18 жыл бұл жер телімін коммерциялық мақсатта пайдалануға әкімшілік рұқсат берген. Тұрғындар да қарсы болмапты. Бұдан былай Әбілқайыр хан даңғылындағы № 89- үйдің тұрғындары дүкенмен көрші болғысы келмейді. Орнына балалар алаңы салынғанын қалайды. Тұрғындар енді прокуратураға барамыз деп отыр.