Тұрғындар қалашығы ауданындағы ескі үйлердің сырты жаңартылады. Қаладағы жомарт мекемелердің қаражатына алдымен Махамбет, Есет батыр, Тілеу батыр көшелері, Жеңіс даңғылындағы барлық үйлер қоңыр, сары түске боялмақ. Бүгін аталған даңғылдағы №11, 13-ші үйлер маңында құрылыс жұмыстары басталды. Шаһардағы ескі үйлердің бастапқы келбетін сақтау аса маңызды. Биыл осы бағытта мердігер мекемелер белсенділік танытуда. Қалталы мекемелердің қаражатына қазір Ливенцов көшесіндегі бірнеше үйдің сырты сырланып жатыр. Төменгі қабат сұр түс, үстіңгі қабат сары түсті болады. Атымтай жомарт кісілер көбейсе ескі қаладағы үйлермен қатар Есет батыр, Тургенев көшелері бойындағы үйлерге кезек келмек. Ал әзірге Тұрғындар қалашығы ауданындағы екі қатарлы 32 үйге екі жарым ай бойы ағымдағы жөндеу жүргізілмек. Әбден тозығы жеткен есік, терезе жаңартылмақ. Тек подъездегі ғана. Бұл аудандағы үйлердің тарихи қасбетін сақтауға "Казхром" Трансұлттық компаниясы" АҚ-ы биыл 520 млн теңге бөліп отыр. Демеушілік мақсатта құйылған қаржы қайтарымсыз. Қалада құлағалы тұрған, ескірген үйлер әлі де бар. Олардың дені кемінде 60 жыл бұрын салынған екі қабатты үйлер. Яғни, құрылыс компаниялары бұл үйлерді сатып алып, орнына жаңа үй сала алады. Ол үшін құрылыс кооперативтері тұрғындармен кездесіп, келісіп, үйді сатып алуына болады. Кәсіпкер бұрынғы ескі құрылысты бұзбас бұрын, ондағы тұрғындардың баспанасыз қалмайтынына кепілдік беруі керек.