Өрттен абай болыңыз! Облыс аумағында 15- тамыздан бері жеке тұрғын үй секторларында өрт қауіпсіздігінің сақталуын бақылау айлығы жүріп жатыр. Іс-шара кезінде бүгін облыстық ТЖД-нің қызметкерлері "АЗФ-10" бау-бақша ұжымында жеке үйлерге бас сұқты. Мамандар үй иелерінің рұқсатымен ішке еніп, пештің жағдайын тексерді. Өрт тудыруы мүмкін әрбір бөліктерді қарап шықты. Облыс аумағында 7 мыңнан аса жер үйге әлі күнге көгілдір отын кірмеген. Ағаш жарып, көмір тасып, от тұтатып отырған үйлер қала іргесінде орналасқан бау-бақша ұжымдарында да кездеседі. Күзге жақын халықтың жылыту маусымына дайындығын пысықтау мақсатында өңірде айлық акция басталды. Іс-шара кезінде ТЖД мамандары "АЗФ-10" бау-бақша ұжымының көшелерінде кездескен адамдарға өрт қауіпсіздігі туралы жазылған ақпараттық парақшалар таратты. Нұсқаулықта өрт қауіптілігі жоғарылайтын жаз, күз мезгіліне сақтық әрекеттер жайы анық жазылған. Рейд барысында тұрғындардың көп жағдайда өрт қауіпсіздігі ережелерін сақтамайтыны анықталды. Жұртшылық газ құрылғыларының өзін талапқа сай етіп орнатпаған. От жағып отырған үйлердің пештері дұрыс қаланбаған. Жыл басынан бері облыс аумағында 451 өрт оқиғасы тіркелген. Тілсіз жаудан 3 ақтөбелік қаза болып, 6 адам әртүрлі дәрежедегі дене жарақаттарын алған. Қызыл жалыннан келтірілген шығын 100 млн теңгеден асады.