"Ақтөбе" әлеуметтік-кәсіпкерлік корпорациясы тоқсанды қорытындылады. Нәтиже бар. Қала іргесіндегі индустриялық аймақта 2 жоба іске асырыла бастады. Олардың бірі ескі доңғалақтан балалардың ойын алаңына қажетті резеңке жабынды шығарады. Жоба құны - 3 миллион доллардан асады. Бұл бала қауіпсіздігі үшін қажетті төсеніш. Ал екіншісі көліктің салқындатқышына қажетті антифриз сұйықтығын өндіреді. Мұнайлы өңір үшін шикізатты жеткізуде ешқандай кедергі жоқ. Сонымен қатар, тағы 5 жобаның құжаты дайын. Олардың арасында полиэтилен қалталарын, көліктің барлық түріне арналған доңғалақ, тау-кен шахталарына арналған бекітпе шағаратын өндіріс орындары бар. Индустриалық аймаққа түрік инвесторлары да көз тігіп отыр екен.
Айта кетейік, «Ақтөбе» әлеуметтік-кәсіпкерлік корпорациясының қызметкерлері Түркияның бірнеше қалалаларында «Ақтөбенің инвестициялық мүмкіндіктері» атты таныстырылым жасады. Нәтижесінде жем-шөп шығаратын, жылыжай салып, қызанақ өсіретін, тоқыма фабрикасы жобасын ұсынған инвесторлар Ақтөбе жеріне келді. Бір тобы әуе рейсі арқылы жеміс-жидек жеткізіп, түрік еліне бізден ет тасымалдауды жоспарлап отыр. Тағы бір бағыт - арзан азық-түлікпен қамтамасыз ету. Жоба жүзеге асса қаланың әр ауданында 10 әлеуметтік дүкен ашылатын болады.
Мұндай әлеуметтік дүкендер тек облыс орталығында емес, әр ауданда ашылады. Қазір аудан орталықтарында арнайы сақтау қорлары әзірленіп, тауар жеткізу тетіктері пысықталып жатыр.