Бүгін ұлт ұстазы Ахмет Байтұрсынұлының туған күні. Осыған орай облыста тілдік онкүндік басталды. Он күн бойы Ақтөбеде түрлі форматтағы шаралар өтеді. Алғашқы жиын бүгін "Тілім менің - баға жетпес байлығым" тақырыбында өтті. Облыс әкімі Оңдасын Оразалин тіл жанашырларымен дөңгелек үстел басында кездесіп, мемлекеттік тіл саясатын жүргізу барысында кездесетін мәселелерді талқылап, ұсыныстарды тыңдады. Бүгінгі жыинның тізгінін ұстаған облыстық тілдерді дамыту басқармасының басшысы Гүлайым Төлебаеваның айтуынша Ақтөбеде жалпы тілдік ахуал тұрақты. Облыс тұрғындарының тілдік әлеуеті жылдан жылға артып келе жатыр. Халықтың тілдік саясатқа көңілі толады. Ал мемлекеттік органдардың құжат айналымындағы мемлекеттік тілдің үлесі 93 пайызға жетті. Қазір қазақша үйренем деушілерге жол ашық. Бәрі бар. Ғаламтор арқылы қашықтан оқыту жүйесі іске қосылды. Қазақ әліпбиін латын графикасына көшіру бойынша облыс республикада халықты ақпараттандыру және реформаны қолдау дәрежесі жөнінен алғашқы үштікке кіреді. Мұндай ауыз толтырып айтарлық жетістіктермен қатар қолбайлау болып отырған мәселелер де жоқ емес. Гүлайым Төлебаева оларды бүгін облыс әкіміне жеткізді. Тілдің мәртебесін көтеру үшін өтетін шараларға жұмсалатын қаражат жыл сайын қысқартуға ұшырайды. Бұл да тіл жанашырларын алаңдатып отыр. Сонымен қатар азаматтардың конституциялық құқығын шектеуге жол бермеу деген желеумен "Тіл туралы" заңда тілді меңгеруге қандай да бір біліктілік талабы қойылмаған. Ал бұл мемлекеттік тілдің қолданыстағы заңнамада белгіленген мәртебесіне сәйкес қызмет атқаруына үлкен тосқауыл болып отыр. Облыстық тілдерді дамыту басқармасының тіл туралы заңнаманы бақылау құзыреті шектеулі. Сол себепті басқарма басшысы "Тіл туралы" заңдарға айтылған мәселелер бойынша өзгерістер енгізу қажет деп есептейді. Бұл ұсыныстарды Мәдениет және спорт министрлігіне жеткізу үшін облыс басшылығынан қолдау көрсетуді сұрады. Ал заңдағы қандай да бір тосқауылдарға қарамастан мемлекеттік тілді меңгеріп, қазақша сөйлеп, ойлап жүрген жастар бүгін көптің ықыласына бөленді. Бүгінгі дөңгелек үстелдің басында мемлекеттік тілдің дамуына кері әсерін тигізіп отырған мәселелер біршама айтылды. Халықтың тарапынан жарнамада кездесетін қателіктерге қатысты арыздар түскенімен, кәсіпкерлерді тексеруге болмайды. Президент халыққа жолдауында кәсіп нысандарын тексеруді тоқтатуға тапсырма берді. Бұл онсыз да өзекті мәселені одан сайын өршітетін сыңайлы.