"Қате жарнамаға жол жоқ!". Осындай атаумен бүгін қаладағы "Мега" сауда, ойын-сауық орталығында акция өтті. Акцияға қатысушылар көшелердегі көз сүрінетін қате жазуларды орталыққа келішулерлің назарына ұсынды. Тіл туралы Заңның сыртқы-көрнекі ақпаратқа қатысты талаптарын жастар ақтөбеліктерге түсіндірді. Мұндай акция бүгін барлық ірі сауда орталықтары мен Халыққа қызмет көрсету орталықтарында, банктер мен Орталық базар маңында жүргізілген. Мамандардың айтуынша, көп мекемеде маңдайшыларына ілінген атаулардың әріптері түгел емес.
Жарнама мәтіндері мен мекеме атауындағы грамматикалық және стилистикалық қателер басты назарға алынған. Акция кезінде баннерлер тиесілі мекеме және ғимараттардың иелеріне ескерту жасалады. Бұрын сауатсыз жазбалар 10 күн ішінде түзетілуі тиіс болатын. Бүгінде қателіктерді жою мерзімі 1 жылға ұзартылған. Кейін айыппұл салынады. Бір жыл тұрмақ, 3 жыл өтіп кетсе де ескертуге құлақ аспай жүрген кәсіпкерлер бар.
Жыл басынан бері облыс бойынша ҚР Тіл туралы Заңының бұзылуы өткен жылмен салыстырғанда 1 пайызға ғана азайған. Ақгүл Садықованың айтуынша, жарнама мәтіндеріндегі немесе ұйым, мекеме атауларындағы қателіктерді көрсе де оны түзетуді талап етіп арызданатындар аз. Облыстық тілдерді дамыту басқармасының мамандары арыз-шағымсыз ешкімге айыппұл сала алмаймыз деп отыр. Ал, басқармада шағымдар қабылдайтын call-орталық жұмыс жасайды. 52-52-65 телефонына қоңырау шалып, тұрғындар деректер жөнінде хабарлай алады.