Ұлттық валютамыз теңгенің қолданысқа енгізілгеніне бүгін 23 жыл. 1993-жылы елбасы Нұрсұлтан Назарбаев бір бума құнды қағазды қолына алып, қазақ зиялылары бейнеленген әр банкнотты халыққа даралап таныстырды. Ал бүгін президент Нұрсұлтан Назарбаевтың суреті бейнеленген 10 мыңдық банкнотты таныстыру мәртебесі Ұлттық валюта төрағасы Данияр Ақышевқа бұйырды. "Бейбітшілік және келісім" сарайында өткен шарадан белгілі болғандай, Тәуелсіздіктің 25-жылдығы мен 1-желтоқсан Тұңғыш Президент күніне арналған жаңа номинал келесі айдан бастап қолданысқа енгізіледі.
Теңгенің алғашқы партиялары Англия мен Германияда басылса, бүгінде теңге мен тиын Тараз қаласында шығарылады. 2011-2013 жылдары аралығында әлемнің үздік банкноты деп мойындалып, әлемде екі тілде шығарылатын жалғыз банкнотқа айналды. Тоқсаныншы жылдары елдің әр екінші азаматы базарларға шығып, сауда-саттықпен айналыса бастағаны белгілі. Солардың бірі Серік Сәкенов. Еліміз тәуелсіздік алғаннан бері іскерлікті кәсіп қылған. Бәрі рубльді теңгеге айырбастаған кезді есіне алды.
Ал қала тұрғындары болса, ақша инфляциясы болмай, теңгенің құны артып, сауда-саттық тек Ұлттық валютада жүрсе екен деген тілек білдірді.
Айта кетейік, Ұлттық ақшамыздың бүгінгі бағамына қарайтын болсақ, 1 рубльдің құны 5 теңге 19 тиын. Ал АҚШ-тың 1 доллары 344 теңгені құрайды. Еуро 370 бірлікке жуықтайды.