Қала көркін бұзып тұрған Сазды өзені қоқыстан тазартылып жатыр. Күтім көрмегеніне біраз уақыт болған бұл жердегі маусымдық жұмыстар күзге дейін жалғасады. Өзеннің жағалауында демалатын қалалықтар үшін барлық жағдай жасалуда.Сазды өзенінің Әбілқайыр ханнан Сәңкібай даңғылына дейінгі бөлігінде маусымдық тазарту жұмыстары басталып кетті. Алдымен арна құрғатылып, табаны өскен шөп, қамыстан тазартылады. Соңғы жылдары мұнда су аз жіберілгендіктен, арнаны қамыс басып кеткен. Қалың қамыс, әрі тұрып қалған су 11-ші,12 ші ықшам ауданда маса, шыбын-шіркейдің қаптауына септік етті. Тұрғындардың шағымынан кейін жасанды өзенді қалпына келтіру жұмыстары қолға алынды. Сазды өзенінің "Нұр ғасыр" мешіті маңындағы бөлігін "SAMGAU-2030 " ЖШС жұмысшылары тазартып жатыр. Жаз, күз айларында өзеннің шөбін бірнеше рет орып, уақытылы тазалап тұратын болады. Қауіпсіздік шаралары сақталып, суда құтқарушы мамандар кезекшілікпен қызмет атқармақшы. Күн сайын өзенге секундына 300 литр су жіберіп отыру жоспарлануда . Сазды өзенін күтіп ұстауға биыл бюджеттен 19 миллион теңгеден астам қаражат бөлінген. Сондықтан осы шараларға бекітілген мердігер компания жұмысшылары су жіберілген уақыттарда қайықпен жүзіп жүріп өзенді тазалап отыратын болады. Дегенмен жұмысшыларға кейде бұл жерлерді қоқыстан тазартуға да туралы келеді. Себебі әрі-бері жүретін қалалықтар артық қалдықтар мен шөлмектерді де өзенге лақтырып жүре беретін болған.