Суда сақ болыңыз!

Жаздың сәні-суға түсу. Күннің ыстығында бір сергіп, суға шомылған жақсы-ақ. Алайда, сақтық шараларын орындамаса, соңы қайғылы жағдайға душар ететінін қаперден шығармау керек. Құтқарушылар, әсіресе балалар мен жасөспірімдерге алаңдаулы. Себебі, шамалы уақыттан кейін каникул басталады. Қараусыз, қадағалаусыз жүрген балғындар судың жағасына баратыны анық.
Төтенше жағдай департаментінің мәліметінше, облыс аумағында шомылуға арналған 64 ресми орын бар. Департаментке су айдындарының түбін тексеруге 69 өтінім келіп түскен. Осыған байланысты 12-17 мамыр аралығында сол учаскелерде түбін тексеру және тазалау жұмыстары жүргізілмек.. Ал 20-21 мамырда жағажайларда кезекшілік ететін құтқарушыларды оқыту жоспарланған. Әйтсе де, шешілмеген мәселе де көп. Қауіпсіздік мәселесіне аудан әкімдері де жауапты.
Облыста суға түсуге тыйым салынған 206 учаске бар. Былтырғы жылы су қоймаларының жанына шомылуға тыйым салатын 321 ескерту белгісі орнатылса, биыл тағы 120 белгі қойылады. Аудан әкімдеріне түгендеу жүргізу және қажет болған жағдайда жадынамалық белгілерді жаңарту тапсырылды.Айта кетейік, соңғы 10 жылда өңірімізде 81 адам суға батты. Ажал құшқандардың жартысы бала.

Количество показов: 22
Дата создания: 14.05.2025 08:05:06