Су тасқынынан баспаналары қирап қалған 66 отбасыға қала маңындағы Өрлеу, Қурайлы, Қызылжар мен Сазды ауылдарынан жер телімдері берілді. Жаңа үйді тұрғызуға құрылыс материалдары да жеткізіліп жатыр. Бір түннің ішінде үйсіз қалған олар, енді жаз бойы жаңа баспана салып алмақ. Су тасқыны салдарынан баспанасыз қалғандардың бірі - Рымбай Өмірзақов. Махамбет ауданында тұрған. Үйі құлап қалған. Ол билік тарапынан көрсетілген көмекке дән риза. 53 жастағы отағасы жақында ғана Қурайлы ауылынан 8 гектар жер телімін алды. Құжаттары да дайын. Жаңа баспана тұрғызуға да қолдау бар. 2500 кірпіш, 2,5 тонна цемент пен өзге де құрылыс материалдары жеткізілді. Бүгін-ертең ол білек сыбана іске кіріспек. Ағайын-туыстың көмегі болады деген сенімде. Махамбет ауданының тағы бір тұрғыны 45 жастағы Қалқаман Мұқанғали. Оған жер телімін өзінің сұрауы бойынша Өрлеу ауылынан беріпті. Мұнда жарық, газ, су да бар. Балабақша мен мектеп те жақын. Отбасым үшін қолайлы жер,- дейді отағасы. Бүгін ол жаңа баспанасының құрылысына жарап қалар деген оймен, қирап қалған үйінің кей бөлшектерін алып кетуге келген. Көмек көрсеткендерге алғысын жеткізді. Су тасқыны кезінде Ақтөбеде 700-ден астам үйді су шайып кеткен болатын. 86 үй қирап, келтірілген шығынды анықтау мақсатында арнайы комиссия құрылды. Үйі құлаған 5 адамға "Нұр Ақтөбе" ауданындағы көп қабатты үйлерден пәтер берілсе, тағы 8 адам уақытша баспаналы болды. Ал 66 адамға қала маңындағы Өрлеу, Қурайлы, Қызылжар мен Сазды ауылдарынанан жер беріліп, 800 мың теңгеге құрылыс материалдары жеткізілді. Тағы да 200 мың теңге құрылысшыларға жұмсалмақ.