Тасқын кезінде үйлері суға кеткен тұрғындар кеше уақытша пана болған мектептерден шығып кетті. Су тартылып, жер кепкеннен кейін Әлия Алтыбаева ескі ет комбинаты ауданындағы лашығына оралды. Ылғал үйдің ішіне кірген. Едені дымқыл, қабырғасы сөгіліп, құлағалы тұр. Әлияның үш қызы бар. Үлкені туғанынан сал. Ол аз дегендей, баланың екі өкпесіне салқын тиіп, туберкулезге шалдыққан. Психоневрологиялық диспансерде ем қабылдап жатыр. Қалған екі қызы Қурайлыдағы интернатта. Әлия сол күні жұмыста болып, әкімдіктің комиссиясына үйін көрсете алмаған. Енді биліктің назарынан тыс қалып қоямын ба деп қауіптенеді. Ескі ет комбинаты ауданындағы "Вагонное депо-1" бау-бақша ұжымында тұратын Азамат Еденовтің де үйі адам көргісіз. Ылғалдан ортадағы пеш құлап қалған. Тасқыннан зардап шеккен бір топ ақтөбелік бүгін қалалық әкімдікте жиналды. Олар суда қалған үйлерін комиссия қарамай жатыр деп шу шығарды. Ал, комиссия барып, тексерген үйлердің иелері бағалаушы компания өкілдерін он күн күту керек деген шартқа наразы. Оларға бағалаушы келгенше үйдегі мүліктерді қозғамаңдар деп ескертілген. Сондай-ақ, халық әкімдіктің көмегі бәріне бірдей беріліп жатқан жоқ деп ашулы. Су тасқынынан зардап шеккендерге өтемақы төлеудің тәртібі қалалық әкімдіктің ресми сайтында көрсетілген. Суға кеткен әр аумақ бойынша жауапты тұлғалар мен олардың байланыс нөмірлері де бар. Әуелі материалдық шығынды толтыру туралы өтініш беру керек.