Саяжай тұрғындары су басқан үйлерін қарап жүр. Қала әкімшілігі жанынан құрылған арнайы комиссия әр үйді аралап, материалдық шығынды есептеуге уәде берген. Саяжай тек жаз мезгілінде бау-бақша салу үшін уақытша мекендейтін аймақ саналғанымен, мәселен, қаладағы "Ақсүт" саяжайы 100-ден астам отбасының тұрақты мекені. Зардап шеккен отбасылардың дені-шығынымыз шаш етектен деп отыр. 45 жастағы Гүлайым Дирманованың үйі тұруға жарамсыз. Осыдан 12 жыл бұрын Әйтеке би ауданынан қалаға көшіп келген отбасы бұл үйді тірнектеп жиған қаржысына тұрғызған. Жұбайы күзетші, өзі аспаз. Үйге кірген су белден келді. Жиһаз, техника бәрі бұзылды, есептегіш құралдар да суда қалқып жүрген. Саманнан тұрғызылған үш бөлмелі үйдің жарлары опырылып тұр. Үй мүлдем жарамсыз ба, әлде жартылай зақым келді ме, мұны тек қана комиссия анықтайды. Жауабын, мамандар 1 жетіден соң айтамыз,-депті. Дирмановтар отбасында кәмелетке толмаған екі бала бар. Қазір олар 30 мың теңгеге пәтер жалдап тұрып жатыр. Гуманитарлық көмек пен тұрғындардың қолдауы зор,-дейді. Басқа ауданнан жер телімін берсе немесе билік қажетті құрылыс материалдарымен қамтамасыз етсе қираған үйін қалпына келтірмек. Осыдан екі апта бұрын қауіпсіз жерге көшірілген тұрғындардың қазір барар жері жоқ. Біреуі туыстарын жағалап жүрсе, енді бірі пәтер жалдап тұрып жатыр. Үйлері қирап, пәтер жағалап жүргендері жергілікті билік өздерін далада қалдырмайтынына сенімді.