Байқауға көлік нөпірі көп жерлерде жерүсті жаяулар өткелін салу, үш "д" форматында жүргіншілер жолағын сызу, "Назар аудар!" атты жол белгісін енгізу секілді ұсыныстар түсті. Соңғы жоба көлікті пайдалану және жүк қозғалысы мен тасымалын ұйымдастыру бөлімінің студенті Аман Айбергеновтікі. Аман "Н" белгісін өзі ойлап тапқан. Таңба әзірге еш жерде қолданылмайды.
Ал, Ислам Мұхтар "Мега" сауда, ойын-сауық орталығы алдында жерүсті жаяулар өткелін салу керек деп есептейді. Өткел осы ауданда көлік іркілісін азайтып, жаяу жүргіншілер қауіпсіздігін қамтамасыз етеді. Студенттің зерттеуінше, аталған аумақтан қазір сағатына мыңнан астам көлік, мыңға жуық жолаушы өтіп жүр.
Жол инспекторлары студенттердің бұл ұсыныстарын ескеруге уәде берді. Үздік жоба авторларына ІІД атынан грамоталар табысталды. Аға инспектор Еркін Өтегеновтің айтуынша, жол-көлік оқиғаларының алдын-алу бойынша жасалған шаралардың арқасында биыл облыста жол апаттары азайған.
Сараптамаға қарағанда, ақтөбелік жүргізушілер көбіне қарсы бағытқа шығып кетіп, жылдамдықты асырып, мас күйінде көлік жүргізіп, апатқа ұшырайды.