Қазақстан спорты күні қарсаңында қала әкімі Ілияс Испанов ақтөбелік спортшылар мен спорт ардагерлерін төл мерекелерімен құттықтады. 13 спортшы мен бапкер алғыс грамоталарымен, сыйақылармен марапатталды. Грек-рим күресінен ҚР спорт шебері, Бразилия төрінде өтіп жатқан Рио-2016 Олимпиадасына қосымша ойыншы ретінде барып келген Руслан Итемгенов те өз әріптестерін құттықтап, төрт жылдан соң күншығыс елінде өтетін әлемдік додаға жолдама алуға үмітті екенін жасырмады. Жеңіл арбадағы биден "Қазақстан Оупен-2016" халықаралық турнирінің жүлдегері Айгүл Бердешева спортпен кез келген адамның айналыса алатынын дәлелдеп жүр. Спорт төрінде жұбына айналған Марат Сейтімовпен бірге халықаралық жарыстарда жүлделі орындардан көрініп келеді. Еске сала кетейік, бүгін қалалық дене шынықтыру және спорт бөлімінің мұрындық болуымен Тұңғыш Президент атындағы орталық саябақта спорттық-мәдени шаралар өтеді.