«СНПС-Ақтөбемұнайгаз» акционерлік қоғамының ұжымы ҚР Тәуелсіздігінің 30 жылдық мерейтойы мен елорда күніне орай «Мәңгілік ел-Қазақстан» атты байқау өткізді. Байқау компанияның әкімшілік департаментінің тіл саясаты және аудармалар бөлімінің бастауымен жүзеге асты. Жарыстың мақсаты қазақтың тілі мен мәдениетін, тарихын дәріптеп, насихаттау. «СНПС-Ақтөбемұнайгаз» акционерлік қоғамының ұжымы ел тарихы мен мәдени құндылықтарын дәріптейтін іс-шараларға белсенді қатысады. Жыл сайын бөлімшелер мен филиалдардың қызметкерлері тіл мәдениетін зерделеу және білімдерін тексеру мақсатында түрлі конкурстар мен тренингтер ұйымдастырады. Байқауға «СНПС-Ақтөбемұнайгаз» акционерлік қоғамының барлық филиалынан 35 жасқа дейінгі 80-ге жуық қызметкер қатысты. Әрқайсысы 6 адамнан құралған 11 топ байқау барысында түрлі тапсырмалар орындап, білім деңгейін көрсетті.Байқау 3 турдан тұрды. 1-тур «Жасампаздыққа толы жылдар» деп аталады. Мұнда тәуелсіздіктің 30 жылдығы турасында мемлекеттік рәміздерге байланысты викториналық сұрақтар қойылды. Ал, 2-турда отандық кинофильмдерден үзінділер көрсетілді. Берілген тапсырма экрандағы суреттер арқылы фильмнің аты мен басты рөлдегі кейіпкердің аты-жөнін табу. Бұл бөлім «Өнер жолындағы жетістіктер» деп аталды. «Шырқа, даусым» деп аталатын соңғы турда қатысушылар жеребе тарту арқылы патриоттық әндер орындады. Байқау қатысушыларға рухани азық қана емес, сонымен қатар, керемет көңіл-күй де сыйлады. Жеңімпаздарға «СНПС-Ақтөбемұнайгаз»АҚ бас директорының атынан байқау кубогы мен құрмет грамоталары табыс етілді.