Шет елден сатып алынған көліктерді Қазақстанда тіркеу акциясы ақпанның бірінде басталды. Алайда бүгін үшінші күн, республика бойынша жалғыз көлік тіркеуден өткен. Ол да Алматы қаласында. Еуразиялық экономикалық одақ елдерінің нөмірлерін әлі шешпеген ақтөбелік жүргізушілер арнайы мамандандырылған халыққа қызмет көрсету орталығына әзірге тек кеңес алып кету үшін барып жатыр. Орталықта кеден, мемлекеттік кірістер басқармаларының мамандары да қабылдау жүргізеді. Мемлекет басшысының тапсырмасымен Армения, Беларусь, Қырғызстан және Ресей нөмірлерімен жүрген көліктерді мемлекеттік тіркеуге алу акциясы ақпанның бірінде басталды. Бір ай бойы жүреді. Көлік иелеріне алдымен 1 жылға уақытша нөмірлер алуға мүмкіндік беріліп жатыр. Бір жыл ішінде шетелден сатып әкелген көлігінің құжаттарын түгендеп, заңдастыруы қажет. Содан кейін барып, тұрақты мемлекеттік нөмір беріледі. Орташа есеппен 1 миллион 325 мың теңге көлікті уақытша тіркеуге алынатын сома. Одан кейін көлікті кәдеге жарату шығыны төленуі керек. Екі ел арасындағы кедендік салық айырмасы тағы өтелуі тиіс. Кедендік салық айырмасы 2014-ші жылдан бергі көліктерге қатысты. Арменияда 2014-ші жылғы көлік сомасының 10 пайызы кедендік салық ретінде ұсталады. Қазақстанда 2014-ші жылы зауыттан шыққан көлікке кедендік салық сол көлік сомасының 16-17 пайызы. Яғни, Армениядан Қазақстанға көлік сатып алып келген адам сол -6-7 пайыз айырманы төлеуі шарт. Одан қалды кәдімгі көлік салығы бар. Әзірге ақтөбеліктер арасында шетелдік көліктерін тіркетіп жатқандары жоқ. Мамандандырылған халыққа қызмет көрсету орталығына тек кеңес алып кету үшін келіп жатыр көбі. Республика бойынша да үш күн ішінде Алматы қаласында жалғыз көліктің шетелдік нөмірі уақытшаға ауыстырылған.