Шалқар ауданында жасөспірімдер төбелесіп, бір бала қайтыс болды. Оқиға сенбі күні кешкі сағат 7-лерде болған. Кеуде тұсынан жарақат алған жасөспірімді дәрігерлер аман алып қала алмады. Аудандық ауруханаға кеуде тұсы жарақатын алған 16 жастағы жасөспірімді жедел жәрдем қызметі емес, балалардың өздері жеткізген. Дәрігерлер жансақтау бөліміне түскен жасөспірімнің өмірін сақтап қала алмады. Көп қан жоғалтқан. Шалқар көліндегі мұз айдынында оқушылар жаппай төбелескен. Күдікті ретінде Шалқар қаласының 17 жастағы тұрғыны ұсталды. Қазір қамауда. Елімізде жасөспірімдер арасындағы жаппай төбелес жиілеп кетті. Жуырда әлеуметтік желілерде бірнеше бейне жазба тараған болатын. Түркістан облысында төменгі сынып оқушыларына жасөспірімдер әлімжеттік көрсетсе, Қызылордада оқушыны дәретханада жаппай ұрып соққан. Ал, Қарағанды облысында орын бермегені үшін 11 жастағы баланы бірнеше рет ұрған. Тізе берсең таусылмайды. Жасөспірімдер арасындағы жаппай төбелестерге орай ішкі істер министрлігі шұғыл шаралар қабылдап жатыр. Бұл туралы министрліктің ресми өкілі Алмас Садубаев мәлімдеді. Жоғарыда атап өткен үш облысқа Ақтөбе де қосылды. Бұл оқиғаларды талқылау үшін ішкі істер министрлігі білім және ғылым министрлігіне жасөспірімдер ісі және олардың құқықтарын қорғау жөніндегі ведомствоаралық комиссияның шұғыл отырысын өткізуді ұсынды. Заң бойынша елде бұзақылық үшін 14 жастан асқан жасөспірім қылмыстық жауапкершілікке тартылады. Ата-аналар мен мұғалімдер осыны оқушыларға түсіндіріп, балаларды үнемі бақылауда ұстауы керек. Себебі, облыстық полиция департаментінің қызметкерлері соңғы үш күнде жүргізген рейд кезінде 200-ге жуық әкімшілік құқық бұзушылық анықтады. Ішкі істер бөлімшелеріне 97 жасөспірім жеткізілді. 84-і түнгі сағат 11-мен таңғы 6.00 аралығында жеткізілген. Қатарында №13, 47,31, 35, Арынов атындағы орта мектептердің оқушылары, колледж және ЖОО студенттері де бар. Түн жарымында жүрген қыздар да анықталды. 7 ата-ана әкімшілік жауапкершілікке тартылды. Оннан астам жасөспірім ішкі істер бөлімдерінің есебіне алынды.