Қалада көше саудасын дамыту үшін 34 жер учаскесі бөлінді. Жақында таратыла бастайды. Бұл туралы бүгін өңірлік коммуникациялар қызметі орталығында баспасөз мәслихатын өткізген қала әкімінің орынбасары Ұшқын Мыңбаев мәлімдеді. Павильондарда жергілікті өндірушілер өнімдерін делдалсыз сатуға мүмкіндік алады. Павильондар орналастыру үшін 250 орын бөлініп отыр. Барлығы бір мезетте таратылмайды. Кестеге сай 2020-шы жылға дейін бөліп таратылады. Бірақ, биыл таратылатын жер учаскесі шамадан тыс болғалы тұр. Павильондарда ет, сүт өнімдері, көкөніс, жемістер, ауыл шаруашылық өнімдері сатылатын болады. Бір орынға 4 адамға дейін таласса, комиссия шешеді. Ал 4-тен көп адам байқауға түссе, жер телімінің тағдыры аукцион арқылы шешіледі. Сондай-ақ, 85 жылжымалы сауда орны бөлініп отыр. Жол етегінде, базарлардың қақпасы алдында жабайы сауданы қыздырып отырғандар үшін. Жылжымалы нүктелерде тұру тегін. Орталық базар маңында павильон болады. Бірақ, санаулы. Керісінше, ол жердегі заңсыз салынған ғимараттар бұзылады. Жабайы сауда жойылады. Жолдары кеңейтіліп, базар маңы ретке келтіріліп, абаттандырылады. Павильон орнату үшін жер учаскесін жалға алу құны жылына әр шаршы метріне 13-17 мың теңгеден. Бәссаудаға қойылатын жер кейін сатып алу құқығымен 5-7 жылға жалға беріледі. Кәсіпкерлердің де павильон орнатуға қолайлы жерлерді көрсетіп, ұсыныс түсіруіне болады. Бірақ, ол жерге бірнеше адам таласса жер учаскесін көрсеткен адамға емес, аукционда жеңгеніне беріледі.