Бүгін қалалық әкімдік қызметкерлері мен мәслихат депутаттарынан құралған жұмыс тобы Кірпішті ауданындағы бірқатар дүкенді аралап шықты. Рейд барысында азық-түлік бағасына мониторинг жүргізіліп, қымбатшылықтың бары анықталды. Алыпсатарлар тағам құнына межелі 15 пайыздан бірнеше есе жоғары үстеме қосып сатып жатыр. Жұмыс тобы кәсіпкерлерге ескерту жасап, әлеуметтік маңызы бар азық-түлікке белгіленген бағалар көрсетілген арнайы жадынамалар таратты. Жұмыс тобы бүгін Кірпішті ауданындағы бірқатар азық-түлік дүкендерін аралады. Бірінші сұрыпты бидай ұнының, нанның, өлшемелі макарон өнімдерінің, қарақұмық жармасы мен күріштің, картоп, сәбіз, пияздың, құмшекер мен күнбағыс майының, жұмсақ қаптамадағы пастерленген сүт пен тауық жұмыртқасының бағаларына баса назар аударылды. Аталған әлеуметтік маңызы бар азық-түліктер бағасын тексеру барысында дүкендердің бірі тауық жұмыртқасының бағасын негізсіз арттырып жібергені анықталды. Мәселен, С1 санатындағы жұмыртқа ондығының өндірушіден босатылатын бағасы 350-370 теңге аралығында. Ал, бұл дүкенде 480 теңгеден саудаланып тұр. Яғни, сауда үстемесі – шекті 15%-дан асып тұр. Мониторингтік топ өкілдері дүкен иелеріне әлеуметтік маңызы бар тауарларға белгіленген баға жадынамасын таратып, сауда үстемесі 15%-дан аспауы керектігін ескертумен ғана шектеледі. Тек, заңбұзушылық қайталанса ғана хаттама толтырылып, сауда нысанының иесі әкімшілік жауапкершілікке тартылатын болады. Қалада азық-түлік сататын 40-тан астам ірі сауда желісі мен 911 шағын дүкендер бар. Жұмыс тобы жыл бойы аталған нысандарды аралап, әлеуметтік маңызы бар азық-түлік бағасын тексеруі қажет. Алайда, бұл тексерістердің нәтиже беруі екіталай. Себебі, биылдыққа жүргізілген рейдтердің нәтижесінде бағаның шарықтауына қатысты 3 қана заңбұзушылық анықталған. Оның өзінде біреуі «негізсіз» деп жылы жабылған. Атап өтейік, тұрғындар күнделікті тұтынатын азық-түлік бағасының негізсіз шарықтағанын байқаса, қалалық әкімдікке шағым түсіре алады. Дәлел үшін жазбаша арызға тауардың чегі мен фото, видеожазбаларын тіркеу қажет.