Шаһардағы қызмет көрсету орындары қалыпты режимде жұмыс жасауға көшуде. Алдағы демалыс күндері спорт залдары, сұлулық салондары, тігін, аяқ киім жөндеу шеберханалары жұмыс жасайтын болады. Ғибадатханалар да ашық. Алайда ол жерлерде адамдардың топтасуына жол берілмеуі керек. Жұмыстары жанданған кәсіпкерлердің "ИнфоҚазақстан.кз" порталына тіркелуі міндетті. Ол жерде өз қызметтері туралы толық ақпарат беруі тиіс. Ал сауда үйлері, жабық базарлардың толыққанды жұмыс жасауы күн тәртібінде тұрған сұрақтардың бірі. Наурыз айынан бері есіктері мүлде ашылмаған мейрамханалардың қашан жұмыс жасайтындығы республика көлемінде әлі шешіле қойған жоқ. Дегенмен шаһар тұрғындары демалыс күндері де моншалар мен шаштараздардың жұмыс жасайтындығына қуанып қалды. Облыстың бас мемлекеттік санитар дәрігерінің 29- тамыз күні жарияланған "Карантиндік шектеу іс-шаралары және кезең-кезеңімен жеңілдету" туралы № 51 қаулысына сәйкес қызмет көрсету орындары мен мекемелер санитарлық талаптарды қатаң сақтауы тиіс. Қызмет көрсету орындарында антисептик сұйықтығы мен залалсыздандыратын ылғалды кілемшесі болмаса мекеме басшылығына айыппұл салынады. Бұл жағдай бірнеше рет қайталанатын болса, нысанның жұмысы тоқтатылады.