Шаһардағы әлеуметтік маңызы бар ескі ғимараттар жаңартылатын болады. Бүгін облыс әкімі Оңдасын Оразалин Ақтөбе гуманитарлық колледжінде жаңадан бой көтерген екінші ғимаратын аралап көрді. 2040 шаршы метр болатын нысан екі қатарлы. Асхана бөлмесі мен мәжіліс залы да қарастырылған. Қомақты қаржыға тұрғызылған нысанның құрылысын жергілікті мердігер қысқа мерзімде аяқтады. Өңір басшысы "Батыс-2" ауданында бой көтерген "Универ" медициналық орталығында да болды. 30 мың тұрғынға медициналық көмек көрсетуге қауқарлы орталықта болашақта 200 маман жұмыс істемек.Ақтөбе гуманитарлық колледжіне тиесілі бұл ғимарат жаңадан бой көтерді. Ішкі сылақ жұмыстары бірер аптаның ішінде бітуі тиіс. Еңселі нысанда бір мезетте 500 студент сиятын мәжіліс залы бар. Төменгі бөлігінде асхана орналасқан. Ғимараттың келесі бөлігінде спорт залы бар. Залда жастардың спортпен шұғылдануына барлық жағдай жасалған. Нысанның құрылыс жұмыстарымен танысқан өңір басшысы Оңдасын Оразалин колледж директоры Ералы Нұрғалиевтен студенттердің жәйін сұрады. Жасөспірімдердің оқуына барлық жағдайды жасау қажеттігін тапсырды. Жыл аяқталар сәттегі өңір басшысының қаладағы атқарылып жатқан жұмыстарды пысықтауы "Батыс-2" ауданындағы "Универ" медицина орталығын аралаумен жалғасты. "Батыс-2" ауданы 18 "Л" мекенжайындағы орталық күніне 250 тұрғынды қабылдауға қауқарлы. 200-ге тарта медицина мамандары еңбек етеді. Орталық алдағы қаңтар айынан бастап аудан жұртшылығына қызмет ете бастайды. Медициналық орталықты аралап шыққан өңір басшысы Оңдасын Оразалин кадрлармен қамтамасыз етуді облыстық денсаулық сақтау басқармасы басшысы Рүстем Исаевке ескертті. Емханаларды көптеп салғанмен, мұндай мекемелерде сапалы кадрдың жұмыс істеуі маңызды деп атап өтті. Медициналық орталықта "Батыс-2" ауданының тұрғындары тегін түрде ем қабылдай алады.