Саяжайда тұрып жатқан мыңдаған адам қалаға қатынай алмай отыр. 312-ші атқыштар дивизиясы даңғылы бойындағы бау-бақша ұжымдарына жолаушы таситын автобустың ұзақ уақыт үзілістен кейін қозғалысы жанданған болатын. Онымен екі-ақ күн жүріп, қайта тоқтады. Тұрғындар ашулы. Екі күн ғана жүріп, тоқтап қалған 56-шы бағыттағы қоғамдық көлік мәселесі біраз адамды сергелдеңге салды. Бау-бақша ұжымдарының тұрғындары екі жыл бойы қалалық әкімдікті жағалап, 56-шы бағытты автобусқа қол жеткізеді. Бірақ екі күн бұрын ғана бекітілген автобус бүгін жолға шықпай қалған. 312-ші атқыштар дивизиясы даңғылына жақын маңдағы барлық саяжай тұрғындары үшін бір ғана мәселе-автобустың жоқтығы. Олар саяжайлардан шығып, бірнеше шақырым жердегі Тургенев көшесіндегі аялдамаға дейін жаяу келетін болған. Осыдан екі күн бұрын 56-шы бағыттағы 2 шағын автобус қайта жүре бастапты. Бүгін қоғамдық көліктер шықпай қалған соң тұрғындар қайта даурықты.56- шы бағытты автобус әр 20-25 минут сайын келіп тұруы тиіс болған. Саяжай тұрғындары екі автобустың шығыны өтелетіндей бұл жерде жолаушылар өте көп дейді. "Қалалық жолаушылар автокөлік кәсіпорны" ЖШС- не тиесілі екі автобус та қазір бұзылып тұрған көрінеді. Жөндеуден өткен соң қызметтеріне қайта кіріседі. Қызмет ұсынушы кәсіпорын басшылығы егер адам көп болып жатса, бұл бағытқа сыйымдылығы үлкен автобустар берілетінін айтты.