Әр азамат тұрақты немесе уақытша тіркеуде болуы қажет. Бұл талап саяжай аумағында тұратындарға да ортақ. Егер саяжайдағы баспананың техникалық төлқұжаты болмаса, жұмыс орнына тіркеле алады. Балаларды мектептер тіркеуге алады. Ал жұмыссыздар мен зейнеткерлер қайда барады? Қамқа Бектасова "Геолог-1" саяжай аумағының төрайымы. Ол бірер күн бұрын ғана қалалық жер қатынастары бөлімі берген құжаттарды толтырып жатыр. Әр үйде тұратын адамның аты-жөні мен қай жерде тіркеуде тұратынын, қараусыз, иесіз қалған жерлерді анықтауы тиіс. Қазір бұл аумақта 90 учаске бар. Оның 70-іне үй салынған, адам қоныстанған. Өзгесі бос, қаңырап тұр. Өзі мен балаларының қауіпсіздігіне алаңдайтын ана уақытша тіркеуге алу жұмысының дұрыс екеніне шүбә келтірмейді. Тіпті, әр адам өз үйінде тұрақты тіркелуі шарт деп отыр. Себебі, жат адамнан кез келген оқыс әрекетті күтуге болады. Уақытша тіркеу талабы бәрінен бұрын саяжай аумағында тұратын, баспанасының техникалық төлқұжаты жоқ тұрғынға қиынға соқпақ. Заң бойынша жұмысы бар адам жұмыс орнына, ал мектеп оқушысы білім ордасына уақытша тіркеледі. Жұмысы жоқ, зейнеттегі адамдардың уақытша бейімдеу орталығынан басқа барар жері болмайын деп тұр. Көше кезбелерін жинап, тіркеуге алатын орталық бұған қалай қарайды? Ол жағы тағы белгісіз. Айта кетейік, уақытша тіркеу мерзімі 1, 3, 6 ай және 1 жылға дейін. Мерзімі өткен соң уақытша тіркелген азамат туралы бар ақпарат деректер базасынан автоматты түрде жойылады.