Бүгін елімізде саяси қуғын-сүргін құрбандарын еске алу күні. Ақтөбеліктер жылдағыдай Түйетөбе сайына жиналды. 1920 40 жылдар аралығында Ақтөбе облысы бойынша 6 мыңдай адам саяси қуғын-сүргінге ұшыраған. Олардың 1 мыңға жуығы ату жазасына кесілген. Олар Түйетөбеге көмілген. Қуғын-сүргін құрбандарының ұрпақтары ескерткіш-белгі басына гүл қойып, ата-бабаларының аруақтарына құран бағыштады. Кеңес билігі қазақ даласында ұлттық мүддені қорғаушыларға, автономия идеясын қолдаушыларға «тап жаулары», «ұлтшылдар», «жат пікірдегілер» деген жала жапты. Халықты оларға қарсы қойды. "Асыра сілтеу болмасын, аша тұяқ қалмасын" деген ұранмен Қазақстанға ашаршылық алып келген Голощекин дәуренінде жағдай одан бетер ушықты. Оның жүргізген саясаты ұлт зиялыларын жаппай қуғындауға алып келді. Голощекин өзіне қарсы шыққандарды қызметтерінен алып, елден қуды, олардың көзін жоюды қолға алды. Саяси қуғын-сүргін Қазақстанда 1928 жылдың ортасынан Алаш қозғалысына қатысқан қайраткерлерді тұтқындаудан басталды. Оларға «буржуазияшыл-ұлтшыл» деген айып тағылды. Олар әртүрлі мерзімге түрмеге қамалды, ату жазасына кесілді, еріксіз жер аударылды. Сонымен қатар молдалар мен діндарларды «басқаша, бөтен ойлайтындар» деп айыптады. Репрессия құрбандары ақталғанға дейін мұның зардабын ұрпақтары да тартты. Ел қатарлы өмір сүру үшін ата-тегін жасырып келгендер болды. 1993 жылы Қазақстанда "Жаппай саяси қуғын-сүргін құрбандарын ақтау туралы" заң қабылданды. Ал 1997-ші жылдан бері 31-мамыр саяси қуғын-сүргін құрбандарын еске алу күні. Қазба жұмыстары кезінде Түйетөбедегі сайдың ішінен адамның бас сүйектері мен қаңқалары табыла бастады. Жазықсыздар жаппай атылған жерге ескерткіш орнатылып, ақтөбеліктер ата-бабаларының рухына тағзым ететін орын пайда болды.