Тұңғыш президент атындағы орталық саябақ алдында болған жол-көлік оқиғасынан зардап шеккен екі адам қазір облыстық жедел жәрдем ауруханасында жатыр. Тағы бір зардап шеккен қыз жедел жәрдем көлігімен ауруханаға жеткізілгенімен алғашқы көмек алып, үйіне кеткен.
7-ші шілдеде қаланың басты даңғылында болған сұмдық оқиғаның іздері әлі жатыр. 3 тәулік ішінде әрине, Тұңғыш президент атындағы орталық саябақтың қираған темір қоршаулары орындарына қайта дәнекерленген. Тротуарға көліктен төгілген май сіңіп қалған және көлік дөңгелегінің ізі қарайып жатыр. Қаза тапқан қыз 19 жаста. Қасындағы жас жігітпен саябаққа серуенге келген. 18 жастағы жігіт Қостанай облысының тумасы. Бас-ми жарақатын алған. Одан бөлек, тағы екі қыз зардап шекті. Бірі аударылған көліктің жүргізушісі. Қасындағы бойжеткен ауруханаға жатудан бас тартқан. 19 жастаға қыз жүргізуші куәлігін осыдан 4 ай бұрын ғана алған. Тәжірибесіздігі жазықсыз жанға ажал болды. Ол қозғалыс кезінде қауіп туған жағдайда жылдамықты бәсеңдету арқылы көлікті тоқтатуға еш шара қолдана алмаған. Қылмыстық іс қозғалды. Бірқатар сот сараптамалары тағайындалды. Куәгерлерден жауап алынуда. Жол оқиғасына кінәлі жүргізуші қыз 5 жылға дейін бас бостандығынан айырылуы мүмкін.