Ақтөбеде міндеттемелерін орындамаған бес жер қойнауын пайдаланушы компаниямен арадағы келісім-шарт бұзылды. Тағы сегізінің мәселесі энергетика министрлігінде қаралып жатыр. Бұл туралы бүгін облыстық әкімдікте өткен жиналыста аймақ басшысы Бердібек Сапарбаев мәлімдеді. Қай компаниялар қандай келісімдерді орындамай отырғанын Энергетика вице-министрі Махамбет Досмұхамбетов жариялады. Энергетика вице-министрі Махамбет Досмұхамбетовтың айтуынша, ақтөбелік жер қойнауын пайдаланушы компаниялар былтыр 456,5 миллиард теңгенің қаржылық міндеттемесін орындаған. Жоспардан 126 пайызға артық. Қаражаттың басым бөлігі 5 ірі компания - "СНПС Ақтөбемұнайгаз", "Қазақойл Ақтөбе", "Сағыз Петролиум", "Қазақтүрікмұнай", "Өріктау оперейтингке" тиесілі. Өңірдің экономикалық-әлеуметтік дамуына жер қойнауын пайдаланушылар былтыр 1,7 миллиард теңге аударған. Жоспар - 2,3 миллиард теңге болатын. Импорттық тауарлардың орнына отандық өнімдерді сатып алу шарты 43 пайызға орындалып отыр. Өткен жылы ақтөбелік жер қойнауын пайдаланушылар 4 триллион 83 миллиард теңгеге тауар алған. Отандық компаниялардың қызметін пайдаланғаны үшін 96,7 миллиард теңге төлеген. Жер қойнауын пайдаланушы компанияларда 10 мың 100 адам еңбек етеді. Соның 98 пайызы - қазақстандық маман. Басшылық орында отырғандардың 87 пайызы - отандасымыз. Екінші санаттағы қызметкерлердің 96 пайызы жергілікті тұрғын болса, үшінші санаттағы жұмысшылар 100 пайыз Қазақстан азаматы. Энергетика министрінің бірінші орынбасары жер қойнауын пайдаланушылардың қызметіне мониторинг жүргізу жалғасатынын ескертті. Міндеттемелерді орындамайтын компаниялармен әңгіме ұзаққа созылмайды. Шарт бұзылады.